सुरेश पाचभाई मारेगाव
मारेगाव: तालुक्यात गावा गावांमध्ये खरीपपूर्व नियोजन व हुमणी अळी व्यस्थापन बाबत सभा घेऊन शेतकऱ्यांना एकात्मिक पिक व्यवस्थापनाबाबत जागृती निर्माण करण्याची मोहीम सुरू आहे. मागील वर्षी तालुक्यात तुरळक ठिकाणी हुमणी अळीचा प्रादुर्भाव दिसून आला होता, यावर्षीही काही ठिकाणी हुमणी अळीचा प्रादुर्भाव होण्याची शक्यता नाकारता येत नाही म्हणून प्रतिबंधात्मक उपाय म्हणून प्रकाश सापळा वापरण्याचे आवाहन तालुका कृषि अधिकारी दिपाली खवले यांनी केले आहे.
नुकताच चोपण येथे सुधीर खिरटकर यांचे शेतावर झालेल्या खरीपपूर्व नियोजन सभेत तालुका कृषि अधिकारी दिपाली खवले यांनी एल निनो च्या पार्श्वभूमीवर लागवडीचे नियोजन याविषयी शेतकऱ्यांना मार्गदर्शन केले. मंडळ कृषि अधिकारी किशोर डोंगरकार यांनी हुमणी अळीचे जिवनचक्र, नुकसानीची पद्धत आणि व्यवस्थापन करिता प्रकाश सापळ्यांचा प्रभावी वापर बाबत शेतकऱ्यांना संबोधित केले.
उपकृषी अधिकारी लोणीकर यांनी फळबाग लागवड अर्थशास्त्र व फळबाग लागवडीसाठी कृषी विभागाच्या योजना समजावून सांगितल्या. उपकृषि अधिकारी देठे यांनी प्रकाश सापळ्याचे प्रात्यक्षिक करून दाखविले तसेच उपकृषी अधिकारी कोषटवार यांनी महाविस्तार ए आय बाबत शेतकऱ्यांना माहिती दिली. सहायक कृषि अधिकारी विवेक पारधी यांनी सभेचे उत्कृष्ट नियोजन करून प्रास्ताविक व आभार प्रदर्शन केले. सदर सभेस सहायक कृषि अधिकारी नकुल थोरात व रोहित जुमनाके यांचेसह परिसरातील शेतकरी उपस्थित होते.