बातमी ऐका (Marathi Voice Reader)
समाजमाध्यमावर झालेल्या प्रेमात एका विवाहित महिलेने आपल्या पती, सासरचे आणि माहेरच्या सर्व नातेवाइकांना नाकारत प्रियकरासोबत जाण्याचा निर्णय घेतल्याची घटना कन्नड ग्रामीण ठाण्यात समोर आली. कन्नड ग्रामीण ठाण्याचे सहाय्यक पोलिस निरीक्षक नारायण गिते यांना बीड पोलिसांकडून वायरलेसवर संदेश मिळाला. चाळीसगाव बाजूकडून कन्नड घाटाच्या दिशेने एक विना क्रमांकाची काळ्या रंगाची कार येत असून, ती ताब्यात घेण्याचे आदेश होते. या माहितीवरून सपोनि गिते, पोउनि बी. एम. मुंडे, महामार्ग उपनिरीक्षक सागर पाटील, तावणे,महेश जाधव, गहिनीनाथ बावनकर,शहेनशहा सय्यद, महिला पोलिस शेळके, शिरसाठ, आर. एन. वाव्हळयांनी सकाळी 11 वाजता घाटातील भांबरवाडी नाक्यावर सापळा रचला आणि संशयित कार ताब्यात घेतली. या कारमध्ये कारचालकासह एक युवती आणि दीड महिन्याचे बाळ होते. पोलिसांनी त्यांना ठाण्यात आणून बीड पोलिसांना माहिती दिली. बीड पोलिस ठाण्यात 13 जून रोजी ही महिला दीड महिन्याच्या बाळासह बेपत्ता झाल्याची तक्रार होती. पोलिसांनी चौकशी केली असता या महिलेचे आठ वर्षांपूर्वी एका व्यापाऱ्यासोबत लग्न झाले असून, तिला चार वर्षांचा आणि एक दीड महिन्याचा अशी दोन मुले आहेत. काही दिवसांपूर्वी इन्स्टाग्रामवर तिची बीडमधीलच एका पुरुषाशी ओळख झाली. तो पुरुषही विवाहित असून त्याला एक मुलगा आहे आणि तो बेरोजगार आहे. या ओळखीचे रूपांतर प्रेमात झाले आणि ती दीड महिन्याच्या बाळाला घेऊन घरसोडून पळून आली होती. कुटूंबाने मनधरणी केली मात्र, अपयश आले. शेवटी जाताना तिने मागे वळूनही पाहिलेच नाही घटनेची माहिती मिळताच महिलेचा पती, सासू, सासरे, आई-वडील आणि भाऊ कन्नड ग्रामीण ठाण्यात पोहोचले. सर्वांनी डोळ्यात अश्रू आणून तिला घरी परतण्याची विनवणी केली. पोलिसांनीही मनधरणी केली. परंतु, महिलेने “मी माझ्या स्वखुशीने या पुरुषासोबत जात आहे,” असा लेखी जबाब दिला. मागे वळून न पाहता बाळाला कडेवर घेऊन प्रियकरासोबत गेली.
