मोर्शी तालुक्यातील खोपडा शेत शिवारातील पाणंद रस्त्यामधून नाली काढून सिमेंट पाईप टाकल्यामुळे शेतकऱ्यांच्या शेतात पाणी शिरून लाखो रुपयांचे नुकसान होणार होते. त्यासाठी खरेदी विक्री संघाचे संचालक नरेंद्र रामटेके यांनी आज, मंगळवारी १६ जूनपासून सहकुटुंब बेमुदत उपोषणाचा इशारा दिला होता. या आंदोलनाची धास्ती घेऊन तहसीलदार सागर ढवळे यांनी आज मंगळवारी घटनास्थळाची पाहणी केली. परिणामी रामटेके यांनी सहकुटुंब बेमुदत उपोषण तूर्त मागे घेतले आहे. काही काळापूर्वी महाराष्ट्र ग्रामीण रोजगार हमी योजनेअंतर्गत खोपडा ते लाडकी पाणंद रस्त्याचे काम सुरू होते. सदर रस्त्यामध्ये कोणतीही शासकीय परवानगी न घेता रामटेके यांच्या शेजारील शेतकऱ्याने ठेकेदाराशी संगनमत करून शिवरस्त्यामधून नाली काढली. या नाल्यामुळे नरेंद्र रामटेके यांचे शेतात पाणी गेले. परिणामी रामटेके यांनी गतवर्षी तहसीलदार यांच्याकडे तक्रार दिली होती. त्या अनुषंगाने शिरखेडचे मंडळ अधिकारी यांनी स्थळ निरीक्षण करून शेजारील शेतकऱ्याने रस्त्याचे बेकायदेशीर खोदकाम करून व पाईप टाकून नरेंद्र रामटेके यांच्या शेतात पाणी सोडल्याचे स्पष्ट अहवालात नमूद केले होते. रामटेके यांनी आपल्या मुलाबाळासह उपोषणाचा मार्ग अवलंबिला होता. परंतु महसूल प्रशासनाने या गंभीर समस्येची धास्ती घेऊन तहसीलदार सागर ढवळे यांनी संबंधित कंत्राटदाराला आदेश देऊन पायलीपासून खाली तीन फुटाची खणती करून दोन्ही बाजूला दोनशे फुटापर्यंत नाली काढून जमा होणारे पाणी नाल्याच्या मार्गाने सोडण्यात यावे, असे आदेश दिले. परिणामी रामटेके यांनी आपले उपोषण तूर्त मागे घेतले.
