जिल्हा परिषदेचे मुख्य कार्यकारी अधिकारी (सीईओ) सत्यम गांधी यांनी मंगळवारी दर्यापूर तालुक्याचा दौरा करून विविध विकासकामांची पाहणी केली. यावेळी प्राथमिक आरोग्य केंद्र, ग्रामपंचायती, पंचायत समिती कार्यालय तसेच विविध विभागांच्या योजनांचा सविस्तर आढावाही घेण्यात आला. काही ठिकाणी नागरिकांसमवेत अगदी खाली बसून त्यांनी संबंधित अधिकाऱ्यांकडून आवश्यक माहिती घेतली. त्यानंतर त्यांनी योग्य सूचना व निर्देश दिले. येवदा येथील प्राथमिक आरोग्य केंद्राच्या भेटीने या दौऱ्याचा प्रारंभ झाला. परिसरातील अस्वच्छता पाहून मुख्य कार्यकारी अधिकाऱ्यांनी नाराजी व्यक्त केली. पुढील भेटीदरम्यान अशी परिस्थिती दिसता कामा नये, असे स्पष्ट निर्देश तालुका वैद्यकीय अधिकारी व वैद्यकीय अधीक्षकांना दिले. यावेळी कर्मचाऱ्यांच्या उपस्थितीची पडताळणी करण्यात आली. संभाव्य मान्सून परिस्थिती लक्षात घेऊन पुरेसा औषधसाठा उपलब्ध ठेवण्याचे निर्देश देण्यात आले. रुग्णांसाठी उपलब्ध बेडशीट, उशा व ब्लँकेटची प्रत्यक्ष पाहणी करण्यात आली. त्यांच्या स्वच्छतेबाबत समाधानकारक व्यवस्था राखण्यास सांगितले. विहित प्रक्रियेनुसार नवीन साहित्य खरेदी करण्याच्या सूचनाही देण्यात आल्या. ऑपरेशन थिएटर, प्रसाधनगृहे व इतर आरोग्य सुविधांची पाहणी करण्यात आली. आवश्यक सुधारणा तातडीने करण्यास सांगितले. त्यानंतर दर्यापूरच्या पंचायत समिती कार्यालयात आढावा बैठक घेतली. यावेळी प्रधानमंत्री आवास योजनेतील टप्पा-१ व टप्पा-२ मधील घरकुले पूर्ण करणे, एफटीओ एका आठवड्यात पूर्ण करणे, लाभार्थ्यांचे हप्ते कोणत्याही परिस्थितीत प्रलंबित ठेवू नयेत, अशा स्पष्ट सूचना देण्यात आल्या. सांगवा ग्रामपंचायतमध्ये आढावा बैठक संपन्न त्यानंतर सांगवा ग्रामपंचायतीला भेट देऊन ग्रामस्थांशी संवाद साधण्यात आला. महिला बचत गटांच्या सदस्यांशी तसेच शाळकरी विद्यार्थ्यांशी त्यांनी विशेष संवाद साधला. विद्यार्थ्यांना “मोठे झाल्यावर काय बनायचे आहे?” असा प्रश्न विचारला. पोलिस, अभियंता आदी होण्याची इच्छा विद्यार्थ्यांनी व्यक्त केली. मुख्य कार्यकारी अधिकाऱ्यांशी थेट संवाद साधण्याची संधी मिळाल्याने विद्यार्थ्यांमध्ये उत्साहाचे वातावरण पाहायला मिळाले.
