केंद्रीय सहकार आणि नागरी हवाई वाहतूक राज्यमंत्री मुरलीधर मोहोळ यांचे वडील किसनराव दगडोबा मोहोळ यांचे गुरुवारी (दि. 18 जून) रात्री 10:20 वाजण्याच्या सुमारास दुःखद निधन झाले. ते 86 वर्षांचे होते. त्यांच्या निधनाने मोहोळ कुटुंबासह पुणे शहर आणि राजकीय-सामाजिक वर्तुळावर शोककळा पसरली आहे. किसनराव मोहोळ यांनी आपल्या सेवाभावी वृत्ती आणि कर्तव्यनिष्ठ स्वभावाने समाजातील एक मोठा समुदाय जोडला होता. किसनराव मोहोळ यांनी पुणे जिल्हा मध्यवर्ती सहकारी बँकेत तब्बल 40 वर्षे अविरत सेवा निभावली होती. बँक क्षेत्रातील कामासोबतच ते एक नामवंत पैलवान म्हणूनही परिचित होते. मोहोळ कुटुंब हे मूळचेच पैलवानांच्या परंपरेतील कुटुंब आहे.1975 मध्ये हे कुटुंब पुण्यात स्थलांतरित झाले आणि कोथरूड भागात स्थायिक झाले. कुस्ती क्षेत्रातील त्यांचे योगदान आणि त्यांचा दांडगा जनसंपर्क यामुळे त्यांनी समाजमनात एक वेगळे स्थान निर्माण केले होते. किसनराव मोहोळ यांचे पार्थिव अंतिम दर्शनासाठी शुक्रवार, दिनांक 19 जून रोजी सकाळी 7 ते 9 वाजेपर्यंत कोथरूड येथील त्यांच्या ‘वेणूकृष्णा’ निवासस्थानी ठेवण्यात आले आहे. त्यानंतर सकाळी 10 वाजता नवी पेठ येथील वैकुंठ स्मशानभूमीत त्यांच्या पार्थिवावर अंत्यसंस्कार केले जाणार आहेत. त्यांच्या पश्चात केंद्रीय मंत्री मुरलीधर मोहोळ यांच्यासह मोठा आप्तपरिवार आहे.
