काशी जगद्गुंरूच्या उपस्थितीमध्ये पंढरीत धर्मसभा, निघाली ग्रंथ दिंडी

पंढरपूर ज्येष्ठ अधिक मासानिमित्त परमपूज्य श्रीमान काशी सिंहासन समाधीश्वर श्री श्री १००८ जगद्गुरु डॉ. चंद्रशेखर शिवाचार्य महास्वामी यांच्या धर्मसभा व ग्रंथ दिंडी सोहळ्याचे पंढरपूर येथील विराट मंगल कार्यालय, परतळे मठ, भक्ती मार्ग येथे उत्साहात आयोजन करण्यात आले होते. वीरशैव लिंगायत समाज टाकळी रोड, पंढरपूर शहर व तालुका यांच्या वतीने धर्मसभेचे आणि ग्रंथ दिंडीचे आयोजन करण्यात आले होते. या कार्यक्रमाला पंढरपूर शहर व ग्रामीण परिसरातील वीरशैव लिंगायत समाज बांधव व भगिनी मोठ्या संख्येने उपस्थित होते. आद्य वीरशैव लिंगायत भजनी मंडळ यांच्या उपस्थितीत पालखी मिरवणूक काढण्यात आली. ग्रंथ दिंडीचे पूजन पंढरपूर वीरशैव लिंगायत समाजाचे अध्यक्ष युवराज डोंबे यांनी सहपत्नीक केले. ग्रंथ दिंडीनंतर श्री श्री १००८ जगद्गुरु डॉ. चंद्रशेखर शिवाचार्य महास्वामी व गुरु सदाशिव शिवाचार्य वेळापूरकर महाराज यांचे कार्यक्रमस्थळी जयघोषात स्वागत करण्यात आले. सूत्रसंचालन डॉ. शोभा कराळे यांनी केले, सिद्धेश्वर कोरे यांनी उपस्थितांचे आभार मानले.