बातमी ऐका (Marathi Voice Reader)
आंतरराष्ट्रीय योगदिनानिमित्त महानगरपालिका आणि श्री हनुमान व्यायाम प्रसारक मंडळ यांच्या संयुक्त विद्यमाने रविवारी २१ जून रोजी सकाळी ७ वाजता नेताजी सुभाषचंद्र बोस इनडोअर स्टेडियम येथे भव्य सामूहिक योगाभ्यास कार्यक्रमाचे आयोजन करण्यात आले. दरवर्षीप्रमाणे यावर्षीही मोठ्या उत्साहात आणि शिस्तबद्ध वातावरणात हा कार्यक्रम पार पडला. योगाच्या माध्यमातून निरोगी जीवनशैलीचा संदेश समाजापर्यंत पोहोचविणे आणि नागरिकांमध्ये आरोग्याविषयी जनजागृती निर्माण करणे हा या उपक्रमाचा मुख्य उद्देश होता. कार्यक्रमाला विधी समिती उपसभापती डॉ. मधुरा मिलींद काहाळे, अमरावती महानगरपालिकेच्या पूर्व झोन क्र. ३, दस्तुर नगर कार्यालयाचे सहायक आयुक्त नितीन बोबडे, सहायक क्षेत्रीय अधिकारी शेखर सोनकांबळे, अभियंता मिलिंद काहाळे तसेच सुधीर रोहनकर यांची प्रमुख उपस्थिती लाभली. उपस्थित मान्यवरांनी योगाचे महत्त्व अधोरेखित करत नागरिकांना नियमित योगाभ्यास करण्याचे आवाहन केले. या कार्यक्रमात डिग्री कॉलेज ऑफ फिजिकल एज्युकेशन, विदर्भ आयुर्वेद महाविद्यालय, पतंजली योग समिती, कॉलेज ऑफ इंजिनिअरिंग अँड टेक्नॉलॉजी तसेच महाबँक ग्रामीण स्वयं रोजगार प्रशिक्षण संस्था यांचा सक्रिय सहभाग लाभला. विविध संस्थांमधील प्रशिक्षक, प्राध्यापक, विद्यार्थी आणि योगसाधकांनी सामूहिकरीत्या योगासने, प्राणायाम, ध्यानधारणा आणि सूर्यनमस्काराचे प्रात्यक्षिक सादर केले. या प्रात्यक्षिकांना उपस्थितांनी उत्स्फूर्त प्रतिसाद दिला. नेताजी सुभाषचंद्र बोस इनडोअर स्टेडियममध्ये आयोजित या कार्यक्रमात विविध शैक्षणिक संस्था, स्वयंसेवी संस्था, योगप्रेमी नागरिक, विद्यार्थी, महिला, युवक आणि ज्येष्ठ नागरिकांनी मोठ्या संख्येने सहभाग नोंदविला. सर्व सहभागींच्या एकत्रित योगाभ्यासामुळे संपूर्ण परिसरात आरोग्य, शिस्त आणि सकारात्मकतेचे वातावरण निर्माण झाले होते. उपस्थितांनी योगाच्या विविध क्रियांचा अनुभव घेत निरोगी जीवनाचा संकल्प केला. अमरावती महानगरपालिका आणि श्री हनुमान व्यायाम प्रसारक मंडळ यांच्या उत्कृष्ट नियोजनामुळे तसेच विविध शैक्षणिक व सामाजिक संस्थांच्या सहकार्यामुळे आंतरराष्ट्रीय योगदिनाचा हा कार्यक्रम यशस्वीरीत्या पार पडला. कार्यक्रमाच्या यशस्वी आयोजनाबद्दल सर्व सहभागी संस्था, प्रशिक्षक, स्वयंसेवक आणि नागरिकांचे आभार मानण्यात आले.
