मारेगाव पोलिसांची धडाकेबाज कारवाई
सुरेश पाचभाई मारेगाव
मारेगाव पोलीस ठाण्याच्या हद्दीतील दंडगाव शिवारातील मार्डा डॅम परिसरात आढळून आलेल्या ४५ ते ५० वर्षीय अनोळखी व्यक्तीच्या हत्या प्रकरणाचा छडा लावत मारेगाव पोलिसांनी अवघ्या २४ तासांत तीन आरोपींना अटक केली होती.
त्यानंतरही या गुन्ह्यात आणखी काही जणांचा सहभाग असल्याचा संशय कायम ठेवत पोलिसांनी तपासाची चक्रे वेगाने फिरवली. अखेर तांत्रिक विश्लेषण व गोपनीय माहितीच्या आधारे आणखी दोन संशयित आरोपींना अटक करण्यात मारेगाव पोलिसांना यश आले आहे.
अटक करण्यात आलेल्या आरोपींमध्ये प्रशांत उर्फ परशु उर्फ ठमकेश्वर पंढरी घागी (वय २०, रा. पावणा, ता. वरोरा, जि. चंद्रपूर) आणि कार्तिक सुनिल निकोडे (वय १९, रा. नागरी, ता. वरोरा, जि. चंद्रपूर) यांचा समावेश आहे. पोलिसांनी दोघांना त्यांच्या राहत्या घरातून ताब्यात घेऊन संबंधित गुन्ह्यात अटक केली आहे.
यापूर्वी अटक करण्यात आलेल्या तीन आरोपींना न्यायालयासमोर हजर केल्यानंतर त्यांची यवतमाळ कारागृहात रवानगी करण्यात आली होती. मात्र, तपासादरम्यान उपलब्ध झालेल्या पुराव्यांच्या आधारे या गुन्ह्यात आणखी दोघांचा सहभाग असल्याचा संशय पोलिसांना होता.
त्यानुसार सुरू असलेल्या शोधमोहीमेला यश मिळाले असून आता या प्रकरणातील एकूण अटक आरोपींची संख्या पाच झाली आहे.ही कारवाई पोलीस निरीक्षक सागर दानडे यांच्या मार्गदर्शनाखाली पोलीस उपनिरीक्षक प्रमोद जिद्देवार, सहाय्यक पोलीस उपनिरीक्षक दिगंबर किनाके, शंकर बारेकर, पोलीस शिपाई सागर दीपेवार, संभा लेणगुरे तसेच मारेगाव पोलीस ठाण्याच्या पथकाने केली.