बातमी ऐका (Marathi Voice Reader)
मुंबई : मुंबईतून एक धक्कादायक बातमी समोर आली आहे. फ्रेंडली लोन म्हणून दिलेले 35 लाख रुपये परत मागितल्याने सराफा व्यावसायिकाचे अपहरण करून मारहाण, जीवे मारण्याच्या धमक्या दिल्याचा धक्कादायक प्रकार वांद्रे येथे उघडकीस आला. या प्रकरणी हितेश जैन, केहुल जैन यांच्यावर 30 जुलै रोजी वांद्रे पोलिसांनी गुन्हा दाखल केला आहे.
नेमकं काय घडलं?
तक्रारदार कैलास राईगर (47) हे झवेरी बाजारात दागिन्यांचा व्यवसाय करतात. त्यांनी सौरभ जैन याला चार महिन्यांपूर्वी 35 लाख रुपये फ्रेंडली लोन म्हणून रोख स्वरूपात दिले होते. ही रक्कम परत मागितल्याने सौरभचा मोठा भाऊ हितेश जैन याने 29 जुलैच्या रात्री फोन करून कैलास यांना शिवीगाळ करून जीवे मारण्याची धमकी दिली. लोनची रक्कम परत मागितल्याने आरोपींनी सराफाला मारहाण केल्याचे पोलिसांनी सांगितले.
हितेशने त्यांना वांद्रे परिसरातील लकी जंक्शन येथे भेटण्यासाठी बोलावले. तेथे पोहोचताच, हितेश आणि त्याचा भाऊ केहुल यांनी त्यांना धक्काबुक्की केली. गस्तीवर असलेल्या पोलिसांचे वाहन दिसताच त्यांनी गाडी पुढे नेली. त्यानंतर, कैलास यांना गाडीत बसवून माहिम परिसरात नेले. जिवे मारण्याची धमकी देत घरी जाण्यापासून अडवणूक केल्याचे कैलास यांनी तक्रारीत म्हटले आहे. दरम्यान, पोलिसांनी हस्तक्षेप केल्याने दोन्ही पोलिस ठाण्यात आणले. कैलास यांच्या तक्रारीवरून पोलिसांनी तपास सुरू केला आहे.
