बातमी ऐका (Marathi Voice Reader)
पुणे : पुणे जिल्हा आणि शहर परिसरात गेल्या काही दिवसांपासून पावसाची रिपरिप सुरूच आहे. दरम्यान, हवामान विभागाने पुणे जिल्ह्यातील घाटमाथ्यासाठी पुढील दोन दिवसांचा ‘ऑरेंज अलर्ट’ जारी केला असून या भागात जोरदार ते अतिजोरदार पावसाचा इशारा दिला आहे. दुसरीकडे, पुणे शहर आणि परिसरात ३१ जुलैपर्यंत अधूनमधून उघडीप पाहायला मिळेल. मात्र ढगाळ हवामान आणि हलक्या ते मध्यम स्वरूपाच्या पावसाच्या सरी कायम राहतील, असा अंदाज वर्तवण्यात आला आहे.
शहरात सलग ४ दिवसांपासून संततधार
पुणे शहरात गेल्या चार दिवसांपासून हलका ते मध्यम पाऊस कोसळत आहे. शनिवारी सकाळी पावसाने काही काळ विश्रांती घेतली होती, मात्र दुपारनंतर पुन्हा हलक्या सरी सुरू झाल्या आणि रात्री पावसाचा जोर चांगलाच वाढला. रविवारी देखील सकाळी हलका पाऊस झाल्याने दिवसभर शहरात ढगाळ आणि आल्हाददायक वातावरण होते. रविवारी शहरात कमाल तापमान २८ अंश सेल्सिअस आणि किमान तापमान २२.८ अंश सेल्सिअस नोंदवले गेले. सोमवार (२७ जुलै) आणि मंगळवार (२८ जुलै) रोजी तापमानात किंचित वाढ होऊ शकते, पण पावसाची रिपरिप सुरूच राहील.
सतत सुरू असलेल्या या पावसामुळे पुणे जिल्ह्यातील टेकड्या, धबधबे आणि जंगल परिसर पूर्णपणे हिरवाईने नटले आहेत. त्यामुळे विकेंडला पर्यटनस्थळांवर पर्यटकांची मोठी गर्दी पाहायला मिळत आहे. मात्र, अतिउत्साहाच्या भरात पर्यटकांनी स्वतःचा जीव धोक्यात घालू नये, असे आवाहन प्रशासनाने केले आहे. सध्या अनेक घाट आणि दुर्गम भागात चिखल झाला असून रस्ते निसरडे झाले आहेत. तसेच झाडे आणि दरडी कोसळण्याच्या घटना घडत असल्याने पावसाळी पर्यटनासाठी बाहेर पडताना पर्यटकांनी आवश्यक ती सर्व खबरदारी घ्यावी, असा स्पष्ट इशारा देण्यात आला आहे.
गेल्या २४ तासांत पुणे जिल्ह्यातील विविध भागांत पावसाची चांगली नोंद झाली आहे. यामध्ये मुळशी तालुक्यातील गिरिवन परिसरात सर्वाधिक ३६.० मिमी पावसाची नोंद झाली. त्याखालोखाल कुरवंडे येथे २४.५ मिमी, तर माळीण भागात १५.० मिमी पाऊस पडला.
