अवैध दारूविक्रीविरोधात थेट कारवाई
प्रशासनाला ५ दिवसांचा अल्टिमेटम
सुरेश पाचभाई, मारेगाव
मारेगाव तालुक्यातील सराटी गावात अवैध दारूविक्रीविरोधात महिलांनी आज जोरदार एल्गार पुकारत थेट कारवाईचा मार्ग अवलंबला. बुधवारी (दि. ९ एप्रिल) सकाळी साडेनऊच्या सुमारास महिलांनी एकत्र येत गावातील संशयित अवैध दारू विक्रेत्याच्या घरावर धाड टाकून मोठ्या प्रमाणात ‘पोवे’ जप्त केल्याची माहिती समोर आली आहे.
या घटनेमुळे परिसरात एकच खळबळ उडाली असून अवैध धंद्याला मोठा धक्का बसल्याचे बोलले जात आहे.गेल्या काही महिन्यांपासून सराटीत अवैध देशी दारू विक्री मोठ्या प्रमाणात सुरू असल्याचा आरोप ग्रामस्थांकडून करण्यात येत होता. विशेषतः महिला वर्गाने याविरोधात आक्रमक भूमिका घेतली असून, यामुळे गावातील तरुण पिढी व्यसनाधीन होत असल्याची गंभीर चिंता व्यक्त करण्यात आली आहे. दारूच्या अतिसेवनामुळे घरगुती वाद, महिलांवरील अत्याचार आणि सार्वजनिक शांततेचा भंग वाढल्याचेही ग्रामस्थांचे म्हणणे आहे.
दरम्यान, संबंधितांना वारंवार समज देऊनही अवैध व्यवसाय सुरूच ठेवण्यात येत असल्याचा आरोप करण्यात आला असून काही ठिकाणी नागरिकांना धमकावल्याच्या घटनाही समोर आल्याचे निवेदनात नमूद आहे.
या पार्श्वभूमीवर सराटी येथील महिलांनी मारेगाव पोलीस ठाण्याचे पोलीस निरीक्षक यांना निवेदन सादर करत तात्काळ कठोर कारवाईची मागणी केली आहे. अवैध दारूविक्रीवर तातडीने छापे टाकून हा व्यवसाय कायमस्वरूपी बंद करण्यात यावा, अशी ठाम भूमिका महिलांनी घेतली आहे.
महिलांनी प्रशासनाला स्पष्ट इशारा देत म्हटले आहे की, पाच दिवसांत ठोस कारवाई न झाल्यास मारेगाव पोलीस ठाण्यासमोर आमरण उपोषण सुरू करण्यात येईल. उपोषणादरम्यान कोणतीही अनुचित घटना घडल्यास त्याची जबाबदारी संबंधित प्रशासनाची राहील, असेही निवेदनात नमूद करण्यात आले आहे.
सदर निवेदनावर सुजाता वनकर, प्रियांका वानखेड, विजया सोयाम, प्रिती उपरे, मंदा सपाट, मनीषा पोटे यांच्यासह अनेक महिला व ग्रामस्थांच्या सह्या आहेत.दरम्यान, या संपूर्ण प्रकरणाकडे पोलीस प्रशासनाने गांभीर्याने लक्ष देऊन योग्य ती कारवाई करावी, अशी मागणी गावकऱ्यांकडून जोर धरत आहे.
