आरोपी प्रियकराविरुद्ध मारेगाव पोलीस ठाण्यात गुन्हा दाखल
सुरेश पाचभाई मारेगाव,
प्रेमाच्या आणाभाका एकीसोबत आणि लग्न दुसरीसोबत लावणाऱ्या प्रियकराविरोधात अखेर फसवणूक झालेल्या प्रेयसीने पोलिसात तक्रार दाखल केली.सदर घटना मारेगाव तालुक्यातील एका गावातील असून या घटनेने प्रेयसीला मोठा धक्का बसला आहे.
तालुक्यातील एका गावातील एका अल्पवयीन मुलीचे तालुक्यातीलच सगणापूर येथील गणेश सुरेश आत्राम वय 23 वर्ष या युवकाशी सूत जुळले.सन 2019 जुळलेले यांचे प्रेम दिवसेंदिवस बहरत गेले.भेटी गाठी वाढल्या.अशातच दि.8/11/2022 ला आरोपीने या अल्पवयीन मुलीला घरी बोलावून 16/11/2022 ला घराचा वास्तू आहे. त्यादिवशीच आपण दोघे लग्न लावू असे सांगून सतत आठ दिवस लैंगिक अत्याचार केला.त्यानंतरही लग्नाचे आमिष देऊन वारंवार लैंगिक शोषण करीत होता.
आणि याची कोठेही वाच्यता केल्यास जीवे मारण्याची धमकी देत होता.अशातच गावातील ग्रामसेवक आणि आशा वर्कर यांनी 18 वर्षे पूर्ण झाल्याशिवाय तुम्हाला लग्न लावता येत नाही असे सांगितले. तसेच 18 वर्षे पूर्ण झाल्यावर याच मुलीशी लग्न करेल असे मुलाकडून कबूलही करून घेतले होते.
मुलगी बाहेर गावाला राहत असल्याचा फायदा घेऊन आरोपी प्रियकराने 1/5/2024 ला दुसऱ्या मुलीशी लग्न केले.या घटनेची माहिती मिळताच मुलीला धक्काच बसला.सन 2019 पासून जपलेले प्रेम एकाएकी तुटून पडले.घेतलेल्या आणाभाका हवेतच विरून गेल्या होत्या.आता काय करावे या विमनस्क अवस्थेत असलेल्या प्रेयसीने अखेर प्रियकराविरुद्ध आपल्या वडिलांसोबत मारेगाव पोलीस ठाणे गाठत तक्रार दाखल केली.
यावरून मारेगाव पोलिसांनी आरोपी प्रियकराविरुद्ध कलम 376(2)(n),506, बाल लैंगिक अत्याचारापासून संरक्षण कलम 3(अ )4,5(आय )6 नुसार गुन्हा दाखल केला असून पुढील तपास ठाणेदार शंकर पांचाळ यांच्या मार्गदर्शनाखाली मारेगाव पोलीस करीत आहे.
