कृष्णराज उगवता सूर्य, त्याला कोणी झाकू शकत नाही:मुलाच्या भाजप युवा मोर्चा प्रदेशाध्यक्षपदी निवडीनंतर धनंजय महाडिकांची प्रतिक्रिया

भारतीय जनता पक्षाने आपल्या संघटनात्मक रचनेत मोठे फेरबदल केले असून, कोल्हापूरचे खासदार धनंजय महाडिक यांचे सुपुत्र आणि सोशल मीडियावरील प्रसिद्ध चेहरा कृष्णराज महाडिक यांच्याकडे ‘भाजप युवा मोर्चा’च्या प्रदेशाध्यक्षपदाची धुरा सोपवण्यात आली आहे. आपल्या मुलाच्या निवडीनंतर खासदार धनंजय महाडिक यांनी आनंद व्यक्त केला आहे. कृष्णराज हा उगवता सूर्य आहे, त्याला कोणी झाकू शकत नाही, अशी प्रतिक्रिया त्यांनी दिली. कृष्णराज महाडिक हे गेल्या काही काळापासून कोल्हापूरच्या राजकारणात सक्रिय आहेत. विधानसभा आणि कोल्हापूर महानगरपालिका निवडणुकीसाठी ते स्वतः रिंगणात उतरण्यास इच्छुक होते. इतकेच नव्हे तर महानगरपालिका निवडणुकीसाठी त्यांनी उमेदवारी अर्जही दाखल केला होता. मात्र, पक्षाच्या आदेशाचा मान राखत त्यांनी दोन्ही वेळी आपली उमेदवारी मागे घेतली होती. त्यांच्या या संयमाची आणि पक्षनिष्ठेची दखल घेत पक्षाने आता त्यांच्यावर राज्याच्या युवा नेतृत्वाची मोठी जबाबदारी सोपवली आहे. कृष्णराज उगवता सूर्य, कोणी झाकू शकत नाही खासदार धनंजय महाडिक यांनी मंगळवारी कोल्हापूरमध्ये माध्यमांशी संवाद साधला. यावेळी त्यांना कृष्णराज महाडिक यांच्या निवडीबद्दल विचारण्यात आले. पुत्राच्या या निवडीनंतर खासदार धनंजय महाडिक यांनी समाधान व्यक्त केले आहे. “भाजप हा कार्यकर्त्यावर कधीही अन्याय न करणारा पक्ष आहे. मी पूर्वी म्हणालो होतो की, कृष्णराज हा ‘उगवता सूर्य’ आहे आणि त्याला कोणीही झाकू शकणार नाही. आज खऱ्या अर्थाने त्या वाक्याची पहाट झाली आहे. आता कृष्णराज संपूर्ण महाराष्ट्रातील तरुणांना पक्षाशी जोडण्याचे काम प्रभावीपणे करेल,” अशा शब्दांत धनंजय महाडिक यांनी आनंद व्यक्त केला. कोण आहेत कृष्णराज महाडिक? राजकीय वारसा लाभलेले कृष्णराज महाडिक यांची स्वतःची एक वेगळी ओळख आहे. ते एक लोकप्रिय यू-ट्युब व्लॉगर असून त्यांच्या चॅनलचे ७ लाखांहून अधिक सबस्क्रायबर्स आहेत. तरुणांमध्ये त्यांचा मोठा चाहतावर्ग आहे. कृष्णराज महाडिक हे यू-ट्युब व्लॉगर सोबतच आंतरराष्ट्रीय कार रेसर देखील आहेत. त्यांनी वयाच्या १४ व्या वर्षी राष्ट्रीय गो-कार्टिंग चॅम्पियनशिप जिंकली होती. तसेच २०१२ आणि २०१३ मध्ये आंतरराष्ट्रीय रोटॅक्स मॅक्स वर्ल्ड ग्रँड फायनलमध्ये त्यांनी भारताचे प्रतिनिधित्व केले आहे. भाजपची नवीन कार्यकारिणीची संपूर्ण यादी