बातमी ऐका (Marathi Voice Reader)
छत्रपती संभाजीनगर : ‘तुझ्या पतीचे दुसऱ्या महिलेशी अनैतिक संबंध आहेत. त्याला महिलेपासून वेगळं करण्यासाठी होम-हवन आणि विधी करावे लागतील,” असे सांगत एका विवाहितेला जाळ्यात ओढलं. तिच्याकडून सोन्याचे दागिने आणि पैसे उकळून तब्बल 5 लाख 12 हजार रुपयांची फसवणूक केली. तसेच घरात अडचणी असल्याचे सांगत उपाय करण्याच्या नावाखाली भोंदूबाबाने विवाहितेला लुटल्याची घटना छत्रपती संभाजीनगरातून पुढे आली आहे.
नेमकं घडलं काय?
गंगापूर तालुक्यातील भेंडाळे येथे एक 26 वर्षीय महिला कुटुंबीयांसह राहते. सोनाली यांच्या पतीच्या मोबाइलमधील एका व्हॉट्सअॅप ग्रुपच्या माध्यमातून मार्च महिन्यात त्यांची कमलाकर जोशी याच्याशी ओळख झाली. सुरुवातीला सोनाली यांनी कौटुंबिक अडचणींबाबत त्याच्याशी चर्चा केली. याचाच फायदा घेत जोशीने त्यांचा विश्वास संपादन केला.
घरातील समस्या दूर करण्यासाठी विशेष होम-हवन विधी करणे गरजेचे असल्याचे त्याने सांगितले. एवढेच नाही, तर पतीचे दुसऱ्या महिलेशी संबंध असल्याचेही सांगून सोनाली यांना मानसिकदृष्ट्या घाबरवले. या कथित विधीसाठी खर्च येणार असल्याचे सांगत त्याने वेळोवेळी त्यांच्याकडून पैसे आणि दागिने घेतले.
लेकीला माहेरी आणत होते, काळ बनून आला कुत्रा अन् वाटेतच… माजी सैनिकाच्या मृत्यूनं छ. संभाजीनगर हळहळलं!
10 मार्च ते 1 जून 2026 या कालावधीत सोनाली यांनी जोशी आणि त्याच्या साथीदारांना 23.5 ग्रॅम वजनाचे सोन्याचे दागिने, ज्यांची किंमत सुमारे 2 लाख 35 हजार रुपये होती, तसेच 7 हजार रुपये रोख दिले. याशिवाय फोन-पे आणि बँक खात्याच्या माध्यमातून 2 लाख 58 हजार रुपये जोशीच्या खात्यावर वर्ग करण्यात आले. अशा प्रकारे महिलेची एकूण 5 लाख 12 हजार रुपयांची फसवणूक झाली.
आपली फसवणूक होत असल्याचे लक्षात आल्यानंतर सोनाली यांनी गंगापूर पोलिसांकडे धाव घेतली. त्यांच्या तक्रारीवरून कमलाकर जोशी, त्याचा मुलगा आणि अन्य दोन अनोळखी व्यक्तींविरुद्ध गुन्हा दाखल करण्यात आला. प्रकरणाचे गांभीर्य लक्षात घेऊन उपविभागीय पोलिस अधिकारी डॉ. नीलेश पालवे आणि पोलिस निरीक्षक सलीम चाऊस यांच्या मार्गदर्शनाखाली तपास सुरू करण्यात आला.
तपास पथकाने तांत्रिक माहितीच्या आधारे आरोपींचा माग काढला. सहायक पोलिस निरीक्षक विठ्ठल झांजुर्णे यांच्या नेतृत्वाखाली पोलिस अंमलदार गणेश जाधव आणि अजितसिंग नागलोत यांच्या पथकाने कर्नाटक, जालना तसेच छत्रपती संभाजीनगर जिल्ह्यात विविध ठिकाणी कारवाई केली. या कारवाईत जोशीसह तिघांना ताब्यात घेण्यात आले.
पोलिसांनी आरोपींकडून 2 लाख 77 हजार रुपये रोख आणि 23 ग्रॅम वजनाचे सोन्याचे दागिने असा एकूण 5 लाख 12 हजार रुपयांचा मुद्देमाल जप्त केला. त्यानंतर न्यायालयाच्या आदेशानुसार जप्त केलेला मुद्देमाल सोमवारी, 10 ऑगस्ट रोजी संबंधित महिलेला परत करण्यात आला.
