गौराळा फाट्याजवळ अपघात; साई मित्र परिवाराच्या रुग्णवाहिकेने जखमीला रुग्णालयात दाखल
सुरेश पाचभाई | मारेगाव
A motorcycle hit a stationary truck from behind; a young man was seriously injured
Accident near Gaurala Phata; The injured were taken to the hospital by the ambulance of Sai Mitra Parivar
मारेगाव: बजाज फायनान्सच्या कामानिमित्त मारेगाव येथे आलेल्या २७ वर्षीय दुचाकीस्वाराची रस्त्यावर उभ्या असलेल्या ट्रकला मागून जोरदार धडक झाली. या भीषण अपघातात दुचाकीस्वार शुभम रवींद्र ठावरी गंभीर जखमी झाला. हा अपघात गुरुवारी (१३ ऑगस्ट) सायंकाळी सात वाजताच्या सुमारास गौराळा फाट्याजवळ घडला.
मिळालेल्या माहितीनुसार, शुभम रवींद्र ठावरी (वय अंदाजे २७, रा. आष्टी, ता. वरोरा, जि. चंद्रपूर) हे बजाज फायनान्सच्या कामानिमित्त मारेगाव येथे आले होते. काम आटोपून दुचाकीने आष्टीकडे परत जात असताना गौराळा फाट्याजवळ रस्त्यावर उभ्या असलेल्या ट्रकला त्यांच्या दुचाकीची मागून जोरदार धडक बसली.
धडक एवढी भीषण होती की शुभम ठावरी यांच्या हाताला गंभीर दुखापत झाली असून हाताचा पूर्णपणे तुकडा पडल्याची माहिती आहे. अपघातानंतर ते गंभीर जखमी अवस्थेत रस्त्यावर पडले होते.
घटनेची माहिती मिळताच रस्त्याने ये-जा करणाऱ्या नागरिकांनी तत्काळ साई मित्र परिवाराच्या रुग्णवाहिकेला माहिती दिली.
काही वेळातच रुग्णवाहिका घटनास्थळी दाखल झाली. जखमी शुभम ठावरी यांना तातडीने मारेगाव येथील ग्रामीण रुग्णालयात दाखल करण्यात आले.दरम्यान, अपघातामुळे गौराळा फाट्याजवळ काही काळ नागरिकांची गर्दी झाली होती. मारेगाव येथील ग्रामीण रुग्णालयात प्राथमिक उपचार करून पुढील उपचारासाठी चंद्रपूर येथे स्थलांतरित केल्याची माहिती आहे.
घटनेची माहिती मिळताच मारेगाव पोलिसांनीही पुढील तपास सुरू केला आहे.या अपघाताचा पुढील तपास ठाणेदार सागर दानडे व पोलीस उपनिरीक्षक रवी बुरकुले यांच्या मार्गदर्शनाखाली मारेगाव पोलीस करीत आहेत.
