यवतमाळ जिल्हा जुनी पेन्शन समन्वय समितीच्या आयोजनात जिल्हाधिकारी कार्यालयासमोर केले धरणे आंदोलन.
जिल्हयातील १ नोव्हेंबर २००५ पूर्वी नियुक्त शिक्षक-शिक्षकेत्तर कर्मचाऱ्यांनी पुकारला एल्गार.
आगामी नागपूर अधिवेशनात करणार शक्ती प्रदर्शन.
मारेगांव तालुका प्रतिनिधी:-गजनान देवाळकर
[8888721480]
यवतमाळ – १ नोव्हेंबर २००५ पूर्वी विनाअनुदानित व अंशतः अनुदानित शाळा/तुकड्यांवर नियुक्त परंतु तद्नंतर १००% अनुदानावर आलेल्या शिक्षक-शिक्षकेत्तर कर्मचारी यांना हक्काची जुनी पेन्शन मिळण्यासाठी महाराष्ट्र राज्य १ नोव्हेंबर २००५ पूर्वी नियुक्त कर्मचारी जुनी पेन्शन समन्वय समिती च्या वतीने शनिवार दि. १० डिसेंबर रोजी दु. १२ ते ५ या वेळेत यवतमाळ जिल्हाधिकारी कार्यालयासमोर धरणे आंदोलन करुन शासनाला जिल्हाधिका-यांमार्फत निवेदन दिल्या गेले.
सदर कर्मचारी मागील ११ वर्षांपासून जुन्या पेन्शनसाठी विविध मार्गांनी शासनाशी संघर्ष करत आहेत. या धरणे आंदोलनात यवतमाळ जिल्ह्यातील प्रत्येक तालुक्यातील पेन्शन पिडीत शिक्षक-शिक्षकेत्तर कर्मचाऱ्यांनी मोठ्या संख्येने सहभाग घेऊन ‘जुनी पेन्शन’चा नारा बुलंद केला.
या धरणे आंदोलनात सहभागी पेन्शन पिडितांनी पेन्शन लढ्याविषयी आपल्या भावना व्यक्त केल्या.यानंतर कोणत्याही संघटनेच्या किंवा राजकीय नेतृत्वाशिवाय केवळ पेन्शन पिडीतांच्या स्वनेतृत्वामध्येच व ‘राज्य समन्वय समिती’ च्या एकमेव झेंड्याखाली पेन्शनसाठी शासनाशी दोन हात करण्याचा दृढ संकल्प केल्या गेला.
सदर आंदोलनामुळे जिल्हातील पेन्शन पिडीत शिक्षक-शिक्षकेत्तर कर्मचाऱ्यांमध्ये नवचैतन्य निर्माण झाले. यानंतर राज्य समन्वय समिती च्या नियोजनानुसार यवतमाळ जिल्ह्यातील प्रत्येक पेन्शन पिडीत शिक्षक-शिक्षकेत्तर कर्मचारी आगामी लढ्यासाठी सज्ज असेल, असा निर्धार यावेळी व्यक्त केल्या गेला.