तालुका प्रतिनिधी कळंब नितेश क्षीरसागर
कळंब, दि. ३० जानेवारी २०२६ स्थानिक शिवशक्ती उच्च प्राथमिक शाळा, कळंब यांच्या वतीने शैक्षणिक वर्ष २०२५–२६ मधील शैक्षणिक सहल मोठ्या उत्साहात आणि यशस्वीरीत्या संपन्न झाली.
विद्यार्थ्यांना पाठ्यपुस्तकांबरोबरच बाह्य जगाचा प्रत्यक्ष अनुभव मिळावा, पर्यटनातून ज्ञानवर्धन व्हावे आणि क्षेत्रभेटीचा आनंद घेता यावा, या उद्देशाने सहलीचे आयोजन करण्यात आले होते.
या सहलीत विद्यार्थ्यांना कोराडी आणि द्वारका वॉटर पार्क या पर्यटनस्थळांना भेट देण्यात आली. जवळपास शंभर विद्यार्थ्यांनी या सहलीत उत्स्फूर्त सहभाग नोंदवला. कोराडी येथील परिसरदर्शनातून विद्यार्थ्यांना पर्यावरण, ऊर्जा निर्मिती व स्थानिक भूगोल यांची माहिती मिळाली, तर द्वारका वॉटर पार्क येथे विविध जलखेळांचा आनंद घेत विद्यार्थ्यांनी सहलीचा मनमुराद आनंद लुटला. शिक्षण व मनोरंजन यांचा समतोल साधणारा हा अनुभव विद्यार्थ्यांसाठी स्मरणीय ठरला.
संपूर्ण सहल सुरक्षित, आनंददायी व शैक्षणिकदृष्ट्या समृद्ध व्हावी यासाठी संस्थेचे व्यवस्थापक प्रा. बाळासाहेब धांदे यांनी मार्गदर्शन केले. सहलीच्या यशस्वी आयोजनात शाळेचे मुख्याध्यापक आशिष महाजन यांच्यासह प्रवीण देशमुख, कु. शालू सदाफळे, कु. चंद्रभागा मेश्राम, मनोज शिवरकर, शिवम चांदोरे, मयूर होले, सौ. प्रांजली दरणे, देवानंद चांदोरे आदी शिक्षक व सहकाऱ्यांनी विशेष परिश्रम घेतले.
पालकांच्या सहकार्याबद्दलही शाळा व्यवस्थापनाने समाधान व्यक्त केले.या शैक्षणिक सहलीमुळे विद्यार्थ्यांच्या निरीक्षणशक्तीला चालना मिळाली असून, मैदानी अनुभवातून सामाजिक जाणीव व सहप्रवासाची शिस्त विकसित झाल्याचे मत शिक्षकवर्गाने व्यक्त केले.
