सांस्कृतिक:जगन्नाथ रथयात्रा, रासलीला, बिहू नृत्य, गरबा,भांगडा, घुमर, झुमर नृत्यातून दिसली विविध राज्यांची संस्कृती

या स्नेहसंमेलनात ओरिसाची जगन्नाथ रथयात्रा, कश्मीरचे ऑपरेशन सिंदूर, गोव्याचे फॉगडी, पश्चिम बंगालचे नृत्य, उत्तर प्रदेश मधील रासलीला, आसामचे बिहू नृत्य, गुजरातचा गरबा, दक्षिण भारतातील बोनालू नृत्य, पंजाबचा भांगडा, महाराष्ट्रातील गोंधळ, वारी. राजस्थानचे घुमर, हरियाणाचे झुमर नृत्य इत्यादी विविध राज्यांची विशेषता व संस्कृती विद्यार्थ्यांनी नृत्यातून दाखवली. निमित्त होते श्रीरामकृष्ण एज्युकेशन फाउंडेशनचे सेठ नंदलाल धूत इंग्लिश मीडियम स्कूल आणि मोहनलाल रामअवतार मानधना या संस्थेचे वार्षिक स्नेहसंमेलनाचे. श्रीरामकृष्ण एज्युकेशन फाउंडेशनचे वार्षिक स्नेहसंमेलन विविधतेत एकता आणि एक भारत श्रेष्ठ भारत या संकल्पनेवर आधारित होते. हा कार्यक्रम केवळ मनोरंजक न राहता सांस्कृतिक समन्वयाचे केंद्र बनला. विद्यार्थ्यांनी विविध राज्यांच्या कला,वेशभूषा आणि परंपरांचे दर्शन घडवून उपस्थितांना मंत्रमुग्ध केले. अध्यक्षस्थानी श्रीगोपाल धूत हे होते. कार्यक्रमाला प्रमुख पाहुणे म्हणून डॉ.वसंत बंग उपस्थित होते. प्रास्ताविक व स्वागत संस्थेचे उपाध्यक्ष व शाळा समितीचे चेअरमन नंदकुमार झंवर यांनी केले. अध्यक्ष धूत यांचा सत्कार संस्थेचे सचिव डॉ.शरद कोलते यांनी केला. डॉ.वसंत बंग म्हणाले, विद्यार्थ्यांना त्यांच्या मनात असलेले प्रश्न विचारू द्या त्यांच्या प्रश्नांना उत्तरे द्या. मुले पालकांच्या अनुकरणातूनच शिक्षण घेत असतात. पालकांच्या वागण्याचा परिणाम विद्यार्थ्यांच्या वागणुकीवर होत असतो. या विद्यालयातील विद्यार्थी शिक्षणाबरोबरच इतर क्षेत्रातही अग्रेसर आहेत . याचे त्यांनी विशेष कौतुक केले. श्रीगोपाल धूत यांनी पारितोषिके मिळवलेल्या विद्यार्थ्यांचे कौतुक करून त्यांना शुभेच्छा दिल्या. प्राचार्या राधिका जेऊरकर यांनी वर्षभरात झालेल्या उपक्रमांचे आणि शाळेच्या शैक्षणिक प्रगतीचे वार्षिक अहवाल वाचन केले. या कार्यक्रमाचे वैशिष्ट्य असे होते की विद्यालयातील विद्यार्थिनींनीच गाणी म्हणून त्यावर नृत्य सादर केली, त्यात गणेश वंदना, पंढरीची वारी, बालगीते, नाट्यगीत, कोळीगीत इत्यादी प्रकार सादर करण्यात आले. या कार्यक्रमातील सर्व विद्यार्थ्यांना संगीत शिक्षिका पुष्पा औटी व शेखर दरवडे यांनी मार्गदर्शन केले. पाहुण्यांचा परिचय उपप्राचार्या गगन वाधवा यांनी करून दिला. अध्यक्ष धूत यांचा परिचय कनिष्ठ महाविद्यालयाच्या उपप्राचार्या संपदा देशपांडे यांनी करून दिला. यावेळी गुणवंत विद्यार्थ्यांचाही गौरव करण्यात आला. हिंदी भाषेतील विविध स्पर्धांमध्ये यश संपादन केलेल्या विद्यार्थ्यांना मार्गदर्शन करणाऱ्या हिंदी शिक्षिका सौ रोथेल लोंढे यांचाही यावेळी सत्कार करण्यात आला. यावेळी संस्थेचे उपाध्यक्ष मोहनलाल मानधना, सहसचिव बजरंग दरक, संस्थेचे विश्वस्त पुरुषोत्तम पटेल, श्रीगोपाल जाखोटिया, रामसुख मंत्री, अरुण झंवर आदी उपस्थित होते. सूत्रसंचालन विद्यालयाच्या समन्वयक सुषमा उजागरे, श्रेयकुमार गुंडू, मौश्युमी लोंढे यांनी, तर आभार संस्थेचे उपाध्यक्ष राजेश झंवर यांनी मानले. छावा नाटकाचे प्रभावी अन् यशस्वी सादरीकरण इयत्ता दहावीच्या विद्यार्थ्यांनी छत्रपती संभाजी महाराजांच्या जीवनावर आधारित छावा या ऐतिहासिक नाटकाचे अत्यंत प्रभावी आणि यशस्वी सादरीकरण केले. छत्रपती संभाजी महाराजांचे शौर्य त्यांचा त्याग आणि धर्मनिष्ठेचा संदेश देणारे हे नाटक पाहताना प्रेक्षक भारावून गेले. या स्नेहसंमेलनात विद्यालयातील ६०० विद्यार्थ्यांनी सहभाग घेतला होता.