नितेश क्षीरसागर | कळंब तालुका प्रतिनिधी
कळंब : येथील अंबिका नगर वॉर्ड क्रमांक १७ परिसरात भाड्याने राहणाऱ्या एका ग्रामसेवक युवकाने गळफास घेऊन आत्महत्या केल्याची घटना शुक्रवार, दि. २४ जानेवारी २०२६ रोजी दुपारी १२ वाजताच्या सुमारास उघडकीस आली. या घटनेमुळे परिसरात एकच खळबळ उडाली आहे.
आत्महत्या केलेल्या ग्रामसेवकाचे नाव प्रतीक संतोष इंगळे (वय २७, रा. चांदूरबाजार) असे असून ते सध्या शेडी येथे ग्रामसेवक म्हणून कार्यरत होते. कळंब येथील अंबिका नगर भागात ते एका घरी भाड्याने राहत होते. राहत्या घरातच त्यांनी गळफास घेऊन जीवनयात्रा संपवल्याचे समोर आले आहे.
घटनेची माहिती मिळताच कळंब पोलीस तात्काळ घटनास्थळी दाखल झाले. पंचनामा करून मृतदेह कळंब येथील ग्रामीण रुग्णालयात उत्तरीय तपासणीसाठी पाठविण्यात आला. आत्महत्येचे नेमके कारण अद्याप स्पष्ट होऊ शकलेले नाही.
या प्रकरणाचा पुढील तपास ठाणेदार राजेश राठोड यांच्या मार्गदर्शनाखाली कळंब पोलीस करीत आहेत. तरुण व होतकरू ग्रामसेवकाच्या अकाली मृत्यूमुळे प्रशासनासह मित्रपरिवार व नातेवाईकांमध्ये शोककळा पसरली आहे.
