उपमुख्यमंत्री अजित पवार यांच्या अपघाती मृत्यूला आज 1 महिना पूर्ण झाला. पण पवार कुटुंबीयांसह अख्खा महाराष्ट्र अजूनही त्यातून बाहेर पडला नाही. राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी आज एका पोस्टद्वारे अजित पवारांच्या आठवणी जागवल्या. तर आमदार रोहित पवार यांनी एक स्क्रिनशॉट शेअर करत महिन्याभरापूर्वी घडलेली घटना झोपेत पडलेले एक वाईट स्वप्न होते अशी भावना व्यक्त केली आहे. अजित पवारांचे सुपुत्र जय पवार यांनीही आपल्या वडिलांचे काही फोटो पोस्ट करत त्यांची आठवण काढली आहे. अजित पवार यांचे गत 28 जानेवारी रोजी बारामती येथे झालेल्या एका विमान अपघातात निधन झाले. तेव्हापासून सत्ताधारी राष्ट्रवादी काँग्रेस व विरोधी बाकावरील राष्ट्रवादी काँग्रेस शरदचंद्र पवार पक्षाच्या आमदार हा अपघात नसून, घातपात असल्याचा आरोप करत आहेत. आज अजित पवारांच्या मृत्यूला 1 महिना पूर्ण झाला असताना त्यांचे सुपुत्र जय पवार यांनी आज त्यांचे काही फोटो शेअर करत आपल्या वडिलांची आठवण काढली आहे. या फोटोत लहानगे जय पवार अजित पवारांच्या खांद्यावर बसल्याचे दिसून येत आहे. ‘मीस यू डॅड’ असे कॅप्शन जय यांनी या फोटोला दिले आहे. अजितदादा सोबत नाही हे पचवणे अवघड खासदार सुप्रिया सुळे यांनीही आपल्या भावाची आठवण काढत दादा, तुम्ही कायम स्मरणात राहाल अशी भावना व्यक्त केली आहे. त्या आपल्या पोस्टमध्ये म्हणाल्या, आपले अजितदादा सोबत नाहीत, हे पचविणे अजूनही कठिण जात आहे. अजितदादांच्या जाण्यामुळे निर्माण झालेली पोकळी कधीही भरुन निघणार नाही. दादा, तुम्ही कायम स्मरणात राहाल. तुमच्यासोबतच्या प्रसन्न क्षणांच्या आठवणी आयुष्यभर कायम सोबत राहतील. Miss you Dada. त्या काळ्या दिवशी कॉल केला, पण… रोहित पवार यांनी एका पोस्टद्वारे अजित पवारांना 28 जानेवारी रोजी सकाळी 8.56 वा. केलेल्या एका फोनचा स्क्रिनशॉट शेअर केला आहे. या पोस्टमध्ये ते म्हणतात, जे घडलंय ते झोपेत पडलेलं एक वाईट स्वप्न होतं, असं अजूनही वाटतं आणि म्हणूनच त्या काळ्या दिवशी अजितदादांच्या या नंबरवर कॉल केला. पण कॉलही उचलला गेला नाही आणि नेहमीचा तो भारदस्त आवाजही ऐकू आला नाही. खूप वेदनादायी..! विमान अपघाताचा आज प्राथमिक अहवाल येणार दुसरीकडे, अजित पवार यांच्या विमान अपघाताचा प्राथमिक अहवाल आज येण्याची शक्यता आहे. त्यात हा अपघात नेमक्या कोणत्या कारणांमुळे झाला यावर प्रकाश पडण्याची शक्यता आहे. त्यामुळे अवघ्या महाराष्ट्राचे या अहवालाकडे लक्ष लागले आहे. दरम्यान, आमदार रोहित पवार यांनी या अहवालातील निष्कर्ष पाहून सोमवारी एका पत्रकार परिषदेद्वारे अजित पवारांच्या अपघाताविषयी काही नवे पुरावे व माहिती जाहीर करण्याचा इशारा दिला आहे. त्यांनी या प्रकरणी शुक्रवारी मुख्यमंत्री देवेंद्र फडणवीस यांची भेट घेऊन त्यांना या प्रकरणात जातीने लक्ष घालण्याचे आवाहन केले. हे ही वाचा… अजित पवारांच्या अपघाताला 1 महिना पूर्ण:युगेंद्र पवारांचे काकांना पत्र; म्हणाले, आजी अन् बाबांचे अश्रू थांबेनात, तुम्ही पोरके करून गेलात दिवंगत उपमुख्यमंत्री अजित पवार यांच्या अपघाती मृत्यूला आज बरोबर 1 महिना पूर्ण झाला. पण आजही पवार कुटुंबीयच नव्हे तर अख्खा महाराष्ट्र त्यांच्या आठवणीने व्याकुळ होत असल्याचे चित्र आहे. राष्ट्रवादी काँग्रेस शरदचंद्र पवार पक्षाचे पदाधिकारी तथा अजित पवारांचे पुतणे युगेंद्र पवार यांनी आज आपले काका अजित पवारांना पत्र लिहून आपल्या भावना व्यक्त केल्या आहेत. त्यात त्यांनी आजी आणि आपल्या बाबांच्या डोळ्यातून आजही तुमच्या आठवणीने अश्रू ओघळतात अशी भावना व्यक्त केली आहे. तसेच तुम्ही अवघ्या महाराष्ट्राला पोरके करून गेल्याची भावनाही व्यक्त केली आहे. वाचा सविस्तर
