बातमी ऐका (Marathi Voice Reader)
नाशिकमधील भोंदूबाबा अशोक खरात प्रकरणात आता एक नवा आणि गंभीर मुद्दा समोर आला आहे. खरात याच्याशी संबंधित काही अश्लील व्हिडिओ सोशल मीडियावर वेगाने व्हायरल होत असल्यामुळे पोलिसांनी तात्काळ कारवाई सुरू केली आहे. या व्हिडिओंच्या माध्यमातून महिलांची ओळख उघड होत असल्याने परिस्थिती अधिक संवेदनशील बनली आहे. या प्रकरणात पोलिसांनी पहिल्यांदाच गुन्हा दाखल करत संबंधितांवर कडक कारवाईची भूमिका घेतली आहे. या व्हिडिओंचे प्रसारण केल्याप्रकरणी अहिल्यानगर जिल्ह्यातील कोपरगाव येथील राहुल शिंदे, योगेश आढाव तसेच बीड जिल्ह्यातील संदीप गरजे या तिघांविरुद्ध गुन्हा नोंदवण्यात आला आहे. पोलिसांच्या तपासात या तिघांमधील व्हिडिओ शेअरिंगची साखळी उघडकीस आली आहे. राहुल शिंदेला हे व्हिडिओ त्याचा मित्र योगेश आढाव याने पाठवले, तर योगेशला ते संदीप गरजे याच्याकडून मिळाल्याचे समोर आले आहे. या प्रकरणात आणखी काही जणांचा सहभाग असण्याची शक्यता पोलिसांकडून व्यक्त केली जात आहे. पोलिसांनी या प्रकरणात भारतीय न्याय संहितेच्या कलम २९४ (२) आणि ३ (५) तसेच माहिती तंत्रज्ञान कायदा २००० अंतर्गत कलम ६७ (अ) नुसार गुन्हा दाखल केला आहे. या कायद्यांनुसार अश्लील सामग्री प्रसारित करणे आणि व्यक्तीची ओळख उघड करणे हे गंभीर गुन्हे मानले जातात. त्यामुळे या प्रकरणातील आरोपींना अटक करण्यासाठी स्वतंत्र पोलिस पथके रवाना करण्यात आली आहेत. ग्रुपच्या ॲडमिनवरही गुन्हा दरम्यान, पोलिसांनी नागरिकांना स्पष्ट इशारा दिला आहे की, अशा प्रकारचे कोणतेही व्हिडिओ किंवा क्लिप्स आपल्या मोबाईलमध्ये असल्यास तात्काळ डिलीट करावेत. विशेषतः पीडित महिलांची ओळख उघड करणारे किंवा त्यांचा सन्मान धोक्यात आणणारे व्हिडिओ शेअर करणे कायद्याने गुन्हा आहे. सोशल मीडियावर अशा प्रकारच्या सामग्रीचा प्रसार केल्यास केवळ संबंधित व्यक्तींवरच नव्हे, तर त्या ग्रुपच्या अॅडमिनवरही गुन्हा दाखल होऊ शकतो. व्हिडिओंचा गैरवापर करू नये, अन्यथा कठोर कारवाई अशोक खरात प्रकरणात आधीच अनेक गंभीर आरोप समोर आले असताना आता या व्हिडिओ प्रकरणामुळे परिस्थिती आणखी गुंतागुंतीची झाली आहे. पोलिसांनी स्पष्ट केले आहे की, पीडित महिलांचा सन्मान राखणे ही सर्वांची जबाबदारी आहे. त्यामुळे कोणीही अशा प्रकारच्या व्हिडिओंचा गैरवापर करू नये, अन्यथा कठोर कायदेशीर कारवाईला सामोरे जावे लागेल.
