मार्चशांतता व कायदा सुव्यवस्था राखण्यासाठी पोलिस प्रशासन सतर्क
सुरेश पाचभाई मारेगाव
मारेगाव : बकरी ईद सण शांततेत, उत्साहात आणि सलोख्याच्या वातावरणात पार पडावा तसेच शहरातील कायदा व सुव्यवस्था अबाधित राहावी, यासाठी मारेगाव पोलिसांनी बुधवारी सकाळी शहरात रूट मार्च काढून नागरिकांना सुरक्षिततेचा संदेश दिला.मारेगाव पोलीस ठाण्याचे ठाणेदार श्याम वानखेडे यांच्या मार्गदर्शनाखाली सकाळी ११ वाजता या रूट मार्चला सुरुवात करण्यात आली.
मार्चपूर्वी पोलिस कर्मचारी व होमगार्ड यांना आवश्यक सूचना देत सतर्कता बाळगण्याच्या सूचना करण्यात आल्या.या मोहिमेत सुमारे २० पोलीस कर्मचारी आणि १७ होमगार्ड सहभागी झाले होते. रूट मार्चची सुरुवात मारेगाव पोलीस स्टेशन येथून करण्यात आली. त्यानंतर बसस्थानक परिसर, डॉ. बाबासाहेब आंबेडकर चौक, गोशिया मस्जिद परिसर, बाळासाहेब ठाकरे चौक, नगरपंचायत मार्ग, मार्डी चौक आदी प्रमुख भागातून मार्च काढण्यात आला.
सणाच्या पार्श्वभूमीवर कोणताही अनुचित प्रकार घडू नये, अफवांवर नियंत्रण राहावे तसेच नागरिकांनी शांतता आणि सामाजिक सलोखा कायम ठेवावा, या उद्देशाने पोलिस प्रशासनाने विशेष खबरदारी घेतल्याचे दिसून आले.रूट मार्चदरम्यान शहरात कडक पोलीस बंदोबस्त ठेवण्यात आला होता. पोलिसांच्या उपस्थितीमुळे नागरिकांमध्ये सुरक्षिततेची भावना निर्माण झाली असून नागरिकांनीही पोलिसांच्या या उपक्रमाचे स्वागत केले.